CEBU, Philippines - Gibaliwala ni Gobernador Gwen Garcia ang pagsaway ni Congressman Tomas Osmeña sa south district sa dakbayan sa Sugbo batok sa iyang amahan nga si 2nd district Congressman Pablo Garcia ug sa iyang igsoon nga si 3rd district Congressman Pablo Garcia tungod sa pagkatudlo niini nga deputy house speaker ug chairman sa House Committee on Public Order and Security ang usa’g-usa.
Ang gobernadora nagkanayon nga dili sayon nga makuha ang posisyong deputy speaker ug ang pagka- chairman sa usa ka komitiba sa kongreso sanglit magkinahanglan kini og sabutsabot sa mga kaubanang mga kongresista ug si kinsa mang mayora sa Sugbo nga mokuwestiyon sa nadawat nga katungdanan sa iyang amahan ug igsoon.
Matud pa sa gobernadora nga ang posisyon nga nahuptan karon sa iyang amahan ug igsoon usa ka kadungganan sa mga Sugboanon tungod kay naila ang kamaayong laki niining mga kongresistaha, matud pa niya.
Samtang gisalikway usab ni Garcia ang alegasyon ni kanhi senador Sony Osmeña nga ang posisyon karon sa iyang amahan ug igsoon giandam aron sa paghasi kang Tomas Osmeña.
Ang gobernadora nagkanayon nga walay kamatuoran ang maong alegasyon ug layo ra kaayo kini sa katuyoan ug tumong nganong nabutang ang iyang amahan ug igsoon sa maong pwesto sa kongreso.
Alang sa gobernador ang mga posisyong nahuptan sa iyang amahan ug igsoon dili binayran kay ang nagbuot niini mao ang mga kaubanan nila sa kongreso kinsa dako og pag-ila sa ilang katakus sa ilang katungdanan. – BANAT NEWS