Magtiayon gipamusil bana namatay

CEBU, Philippines - Namatay ang usa ka drayber sa traysikad samtang naangol usab ang asawa niini nga mamuhatay og lumpia human sila pamusila sa wala hiilhing mga kriminal didto sa Sitio Cogon, barangay Cogon Cruz, siyudad sa Danao niadtong Martes sa alas 6:00 sa gabii.

Ang mga biktima mao ang magtiayong Pedro Colipano Areja, 54, ug Redima Areja, 53, nga taga Danao.

Si PO2 Marlon Remollo sa Danao City Police Station mibutyag sa  Banat News nga ang magtiayon paingon nang mamauli sa ilang balay ug gi-abayan nila ang ilang traysikad didto sa sagkaong bahin sa karsada dihang giatangan sila sa duha ka wala hiilhing lalaki kinsa midiretso og pamusil kanila.

Si Pedro nasabak sa tiyan ug tuong dughan ug may samad pang milapos sa walang bahin sa iyang aping, samtang ang iyang asawa naigo usab sa tuong bukton.

Gidali paghatod ang magtiayon ngadto sa Danao District Hospital diin si Pedro gideklarar nga dead on arrival samtang si Redina gibalhin usab dayon ngadto sa tambalan sa dakbayan sa Sugbo.

Padayon pang gipangita karon sa kapolisan ang mga kriminal kinsa dali kaayong misibat human sa hitabo. – BANAT NEWS