Kapitan gipusil sa iyang tresurero

CEBU, Philippines - Kapitan sa usa ka barangay sa amihanang Sugbo gipusil sa kaugalingon niyang tresurero nga iyang gitaktak sa serbisyo. Nahitabo kini kagahapon sa alas 7:40 sa buntag sa barangay Calambua, utlanan sa lungsod sa Tabuelan ug San Remegio.

Si Kapitan Ricardo Rondina sa barangay Canluhangon, bukirang bahin sa lungsod sa Tabuelan, gipusil sa iyang tresurero nga si Daniel Montealto, 44, anaa magserbisyo sa barangay Canluhangon apan nagpuyo sa barangay Calambua, lungsod sa San Remegio.

Matud pa ni PO2 Yuri Colonia sa Tabuelan Police Station sa dihang nahinabi sa Banat News nga si Kapitan Rondina miadto sa balay ni Montealto sa sayong buntag kagahapon aron pagkuha sa mga resibo ug uban pang dokumento sa barangay human usab niya kini gitaktak pagka-tresurero pipila na ka semana ang nakalabay.

Apan misangko hinuon sa panaglalis ang panag-abot ni Rondina ug Montealto. Si Montealto mikuha og armas nga Carbine ug gipusil ang kapitan. Maayo na lang kay nakabantay ang kapitan ug ang tuong bukton lang niini ang naigo ug milapos ang bala.

Si Kapitan Rondina daling gidala sa Verallo District Hospital sa dakbayan sa Bogo ug gika-report nga luwas na sa peligro, samtang si Montealto nadakpan dayun sa mirespondeng kapolisan sa Tabuelan.

Matud ni PO2 Colonia nga gi-turn over usab dayon nila sa kapolisan sa San Remegio si Montealto tungod kay nasakop na man sa maong lungsod ang gipuy-an niini human mibalhin og puyo.

Dugang nahipos nga report nga managlahi og partido ingon man kandidato nga gisuportahan si Kapitan Rondina ug Montealto niadtong Mayo 10 nga eleksiyon nga maoy usa sa posibleng hinungdan sa ilang panagbangi.  – BANAT NEWS