Lingam Spa sa Marina Mall nagpadayon

CEBU, Philippines - Giangkon ni Mayor Paz Radaza sa dakbayan sa Lapulapu nga hangtod karon nagpadayon ang operasyon sa usa ka spa sa Marina Mall sa barangay Pusok nga nagtanyag og “lingam massage.”

Human miluwat og mando si Radaza pagpatak-op sa operasyon sa Chuva-Chuva Spa nga nagtanyag og lingam massage nga nahimutang sa barangay Pajo, ang spa sa Marina Mall nga mao ang Healing Space nagpadayon sa ilang operasyon ug padayong nagtanyag og lingam massage.

Matud pa ni Radaza nga wala sila makaluwat og kamanduan sa pagpasirado sa Healing Space gumikan kay anaa kini nahimutang sa hurisdiksiyon sa Philippine Economic Zone Authority (PEZA) nga maoy nagdumala sa Mactan Export Processing Zone.

Gipasabot ni Radaza nga hangtod karon nagpadayon pa ang kaso batok sa MEPZ sa Regional Trial Court branch 141 sa Pasay kalabot sa pagtino sa saktong hurisdiksiyon sa mga nag-abang sa Marina Mall ug kun asa kini mokuha og business permit, sa PEZA ba o sa lokal nga kagamhanan sa Lapulapu.

Base sa pamahayag ni Atty. James Abadia sa Lapulapu City Attorney’s Office nga ila pang gitun-an og maayo ang kalapasan sa Healing Space.

Kahinumduman nga base sa rekomendasyon ni Lapulapu City health officer Rodolfo Berame nga angayang tak-upan ang Healing Space Spa and Lingam Services gumikan kay wala kini mokuha og Mayor’s Permit, Sanitary Permit ug walay health cards ang mga masahista niini.

Nasuta usab nga walay lisensiyadong therapist nga nagsuperbisar sa mga masahista sa maong spa.  – BANAT NEWS