Nangayo'g sigarilyo giluba angol

CEBU, Philippines - Usa ka tawong nangayo og sigarilyo giluba sa iyang gipangayoan didto sa sitio Campar, barangay Pardo ning dakbayan sa Sugbo sa miaging kaadlawon.

Ang biktima mao si Brian Alesna Buenavista, 24, usa ka bodegiro nga taga Campar, samtang ang miluba kaniya wala hiilhi.

Sumala sa kapolisan nga migawas sa ilang balay nianang alas 4:00 sa kaadlawon ang biktima kay gialimot-an dihang may tawong milabay nga nagpabuhot og sigarilyo.

Ang biktima kinsa naglaway kay wala kasigarilyo, nangayo og yusi sa maong tawo, apan imbis yusi ang ihatag kutsilyo hinuon maoy gihansak sa tiyan sa biktima.

Gihatod dayon sa tambalanan ang biktima samtang gipangita pa sa kapolisan ang kriminal.

Ang mga tigpaniid nagkanayon nga mao ni pago sa mga tawong kayoan og sigarilyo bisan sa dili nila kaila. – BANAT NEWS