Vidal wala matagbaw sa SONA ni PNoy

CEBU, Philippines - Ang pagbisto ni Presidente Benigno “Noynoy” Aquino III sa mga anomaliya sa milabay’ng administrasyon giisip ni Cebu Archbishop Ricardo Cardinal Vidal nga usa ka klarong paghatag og katin-awan sa tinuod nga kahimtang sa nasud karon.

Apan nakuwangan si Vidal nga wala hisguti ni Aquino ang mga isyung naglambigit sa simbahan, edukasyon ug ang kontrobersyal nga Reproductive Health Bill ug sex education.

Si Aquino mipalanog sa iyang labing unang State of the Nation Address (SONA) niadtong milabay’ng Lunes diha sa Batasang Pambansa miyagyag sa tanang anomalya sa pamunoan ni kanhi presidente ug karon Kongresista Gloria Macapagal Arroyo.

Gibutyag ni Aquino ang mga kwestyonableng pagpagawas sa mga pundo alang sa mga proyektong gihulagway niyang paggasto-gasto lang sa panudlanan sa katawhan nga walay klarong kapuslanan.

Matud pa ni Vidal makahatag og dakong kaayohan sa katawhan ang pagpahibawo sa tinuoray’ng kahimtang karon sa Pilipinas apan gikulangang siya gumikan kay wala maghisgot sa mga isyung may papel ang simbahan.

Ang Cardinal miawhag sa katawhan nga paluyohan si Aquino sa iyang mga lakang.

Si Cebu City Mayor Michael Rama kinsa mitambong sa sona nanghinaot nga matuman ni Aquino ang iyang mga gipanaad ilabi na ang pagtarong sa mga kahiwian ug paglutos sa mga sad-an.

Sumala pa ni Rama nga kun mahunong na ang korupsyon sa nasud mosunod ang kalamboan niini.

Hinuon ang mga negosyante sa Cebu City Chamber of Commerce nalipay sa awhag ni Aquino sa mga local government units nga dili langayon ang pag-isyu og mga business permits sa mga negosyante.  - Chester Abadilla ug Sande Anadia (BANAT NEWS)