Lalaki gidunggab namatay

CEBU, Philippines - Namatay ang usa ka lalaki human kini dunggaba sa wala hiilhing kriminal didto sa sitio Upper Gun Club Banawa, barangay Guadalupe, ning dakbayan sa Sugbo sa miaging kaadlawon.

Ang biktima nailhan nga si Moreno Giron Jr., hingkod , ug usa ka trabahante sa glass/aluminum nga tindahan, nga taga sitio Langub, barangay Kalunasan, ning dakbayan sa Sugbo.

Ang silingan sa biktima nga si Avenar Sanches, 28, maoy mitaho sa kapolisan nga samtang nagpaingon siya sa trabaho, iyang nakit-an ang biktima nga nagluko sa daplin sa karsada nga naglunang sa iyang kaugalingong dugo.

Si Ghea Cabigas, 17, higala sa biktima miingon nga nianang sayong kagabhion, mitambong og birthday party sa ilang silingan ang biktima ug hubog kining mipauli sa ilang balay.

Nakurat nalang siya dihang nagkagubot na ang ilang mga silingan human mapalging patay na ang biktima.

Nasuta nga ang biktima may samad dinunggaban   sa walang bahin sa dughan nga maoy gituohan sa kapolisan nga hinungdan sa hinanaling kamatayon niini.

Gipangita pa sa kapolisan ang killer. – BANAT NEWS