Dalagita gipatay sa 3 ka bata

CEBU, Philippines - Patay diha-diha dayon ang usa ka 15-anyos nga babayeng tinun-an sa high school sa dihang gipusil sa mga minor de edad atol sa disko diha sa sitio Soong barangay Mactan dakbayan sa Lapulapu sa milabay’ng gabii.

Ang biktima mao si Rica Mae Inot, 15, residente sa barangay Bankal dakbayan sa Lapulapu usa ka 2nd year High School sa Bankal National High School.

Padayon pang gipangita sa kapolisan ang duha ka managsuong babaye ug lalaki nga pulos minor de edad nga gitumbok nga maoy namusil diha sa mga tawo ug nakaigo kang Inot.

Sa pasiunang imbestigasyon ni SPO3 Rex Ibañez ug SPO2 Rolito Jumao-as nasayran nga mga sa 9:30 sa milabay’ng gabii adunay mga kalingawan tungod sa kapistahan sa sitio Soong.

Si Inot uban sa tulo ka higalang babaye namista sa maong dapit ug nanisko apan kalit lang usa ka motorsiklong gisakyan og duha ka batan-on ang miabot ug ang backrider mipusil sa ulo sa biktima.

Si Inot nga naigo sa iyang agtang gikan sa usa ka rebolber ug patay kini diha dayon samtang dali nga nakapahilayo ang mga mamumuno luwan sa usa ka motorsiklo.

Sumala pa sa kapolisan base sa pamahayag sa mga nakasaksi usa ka batan-ong babaye ang nagmaneho sa motorsiklong gisakyan sa mamumuno.

Hinuon nakuha sa mga residente ang plaka sa maong motorsiklo nga NR-7839 ug karon ila nang gisubay diha sa Land Transportation Office kun si kinsa ang tag-iya niini.

Matud pa ni Jumao-as nga ila nang nasubay ang mga responsable ug ilang nahibaw-an nga managsuong pulos minor ang mga gikatahapan apan wala na sila sa ilang panimalay sa dihang ilang giadto.

Nasuta usab sa imbestigasyon nga daw dili si Inot maoy gituyoan pagpusil apan nagduda silang buot lang makabalos sa mga gikatahapan sa mga batan-on diha sa maong lugar gumikan kay giingong nakulatahan sa mga batan-on ang gunman diha sa maong lugar.

Sumala pa sa mga impormasyong nakaylap sa mga imbestigador gibalikan sa gunman ang mga batan-ong mikulata kaniya ug nagdala na og armas ug nagpataka og pamusil ug nianang tungura naigo sa agtang si Inot.

Gikatahong makadaghang higayon kablita sa gunman ang armas apan makausa ra kini mibuto nga maoy nakaigo kang Inot ug dayon nagdali sa pag-ikyas.

 Ang mga saksi nagduhaduha sa pagluwat og affidavit sa maong hitabo apan positibo nilang giila ang mga suspetsado nga managsuon. (BANATNEWS)