Sakit nga cancer gituki

CEBU, Philippines – Mikapin sa 30 ka tawo ang nagpakonsulta sa Libreng Public Medical Talk ug One on One Discussion nga gipahigayon didto sa Parkway Cancer Centre (PCC) sa PAGCOR nga nahimutang sa Cebu Waterfront Hotel ning dakbayan sa Sugbo sa miaging adlaw.

Si Dr. Ang Peng Tiam, Senior Consultant, Medical Doctor sa PCC sa Singapore maoy dinapit nga mamumulong sa maong kalihokan, diin iyang gibutyag nga kaniadto ang cancer giisip kining sama sa death sentence sa usa ka tawong mataptan niini, apan sa pagkakaron tungod sa mga nagkadaiyang pagtuon, uban ang mga therapy ug bag-ong teknolohiya, ang cancer dili na kini matawag nga death sentence.

Iyang gipresentar ang nagkalaing-laing kaso sa cancer sama sa lymphoma, testicular, cancer sa bukog, baga, ilong ug ang labing kumon mao ang breast cancer nga iyang giayo pinaagi sa bag-ong teknolohiya. 

Matud pa ni Dr. Ang nga ang nakapabug-at sa sakit nga cancer kay mokabat sa minilyon ka pesos ang magasto sa usa ka pasyente niini busa angayan lang mangayo og tabang sa gobyerno ang hingtungdan.

Gibutyag niya nga usa sa mga hinungdan sa sakit nga cancer mao ang sobrang pagbuwad sa kainit sa adlaw, sobrang pag-inom og alak, pagpanigarilyo ug uban pa.

Pipila sa mga simtomas sa sakit nga cancer mao ang kadugay maayo kun masamad, lusay sa totoy o sa laing parte sa lawas; dili normal nga pagregla sa babaye, dili normal nga pagkalibang, dili normal nga pagturok sa awom. (BANAT NEWS)