Pobreng pasyente libre's tambal

CEBU, Philippines – Ang kagamhanan sa dakbayan sa Sugbo migahin og P30 milyones nga ipanghatag niadtong masakitong mga molupyo ning dakbayan kutob karong Disyembre, sumala ni Marivic Alolod sa City Hall.

Si Alolod kinsa maoy administrative officer sa Hospitalization Assistance and Medicine Program (CHAMP) nagkanayon nga matag pasyente hatagan nila og P5, 000 nga balor sa tambal ug P25,000 nga bayad kun kini mahospital.

Matud pa niya nga una kini madawat sa masakiton, pihuon gyud nila pag-ayo pinaagi sa pagsukitsukit, nga taga dakbayan sa Sugbo ang pasyente.

Kini aron sa pagsiguro nga ang taga syudad sa Sugbo ra maoy makapahimulos niining programaha, kay ang dili taga dinhi, may gidawat man usab silang mga benepisyo gikan sa ilang mga mayor sa lungsod.

Midugang si Alolod nga may mga Botika na nga ilang gisuki sa pagkakaron aron adto kompraha sa usa ka masakiton ang tambal nga gikinahanglan sa iyang lawas.

Hinuon kun mosubra usab sa P5,000 ang makomprang tambal sa pasyente, ila na ang sobra kay ang P5,000 ray bayran sa gobyerno. (BANAT NEWS)