CEBU, Philippines – Mikagulkol sa prisohan ang usa ka esnatser human kini hidakpi gikan nga milabni sa ariyos sa usa ka babaye didto sa Tabo sa Banay sa barangay Santo Niño, ning dakbayan sa Sugbo sa miaging udto.
Ang suspetsado mao si Eduardo Durano, 36, minyo, nga taga sitio Tabuk-Canal, barangay Pardo, ning dakbayan sa Sugbo, samtang ang biktima mao usab si Michelle Singh, 26, asawa sa usa ka Indian National, nga taga barangay Dumlog, dakbayan sa Talisay.
Sumala sa kapolisan nga nag-atang og sakyanan ang biktima uban sa duha ka anak niini sa nahisgutang lugar, dihang kalit lang gisakdapan sa suspetsado ug gilaksi ang ariyos sa dunggan sa nahauna.
Nataymingan usab nga pagsiyagit sa biktima nabatian ni Catalino Entoma Jr., sakop sa Barangay Intelligence Network (BIN) nga diha sa maong lugar sa maong higayon busa gigukod dayon niini ang suspetsado. (BANAT NEWS)