Gikang nanisko gipusil kritikal

CEBU, Philippines – Kritikal ang kahimtang sa usa ka lalaki kinsa gipusil didto sa sitio Upper Cogon, barangay Poblacion 1, syudad sa Carcar kagahapon sa kaadlawon.

Ang biktima mao si Reynaldo Barawidan, 38, nga taga Carcar, samtang ang suspetsado nailhan usab nga   si Rey Campugan, hingkod,   molupyo gihapon sa maong dakbayan. Base sa pasiunang imbestigasyon sa kapolisan sa syudad sa Carcar nasayran nga ang biktima uban sa iyang   igsoon nga babaye naglakaw sa karsada gikan sa gipahigayong disko sa ilang barangay.

Dihang kalit lang mitungha ang suspetsado sa karsada ug sa walay igong hinungdan giluthang ang biktima.

Dihang nahagba ang biktima midagan dayon pahilayo sa maong lugar ang suspetsado, apan naklaro ang iyang dagway sa igsoon sa biktima.

Ang biktima nakaangkon ug samad pinusilan sa iyang tuong bahin sa buko-buko ug gihatod dayon kini ngadto sa Carcar City Districxt Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo. (BANAT NEWS)