Blasting caps sakmit sa Talisay

CEBU, Philippines – Nagtingkagol sa Talisay City detention cell ang usa ka 44-anyos nga lalaki human kini maimbargohi sa mga polis og blasting caps niadtong Sabado sa hapon diha sa barangay San Roque, dakbayan sa Talisay.

Ang suspetsado mao si Antonio Oliveros, residente sa nahisgutang lugar kinsa naimbargohan og upat ka blasting caps nila ni PO3 Alfredo Cuizon, PO2 Henry Mata ug PO1 Jundave David.

Si Sr. Insp. Marlon Gumabao, deputy chief sa Talisay City Police Station nga nahinabi kagahapon sa Banat News nagkanayon nga nakadawat sila og tawag sa telepono gikan sa residente sa lugar kabahin sa giingong ilegal nga kalihukan ni Oliveros.

Ang blasting caps usa sa mga component sa pagbuhat og dinamita nga kasagarang gamiton sa mga mananagat nga manirohay.

Matud ni Gumabao nga duna silay nadawat nga report nga kaniadto pa mamuhatay na og mga blasting caps si Oliveros apan wala lang kini madakpi.

Si Gumabao midugang nga si Oliveros mihimakak sa pasangil nga hangtud karon padayon pa kini sa maong ilegal niya nga kalihukan. (BANAT NEWS)