SONA ni Pnoy giatangan

CEBU, Philippines – Bisan pa man sa tilimad-ong iyagyag ni Presidente Benigno "Noynoy" Aquino III atol sa iyang labing unang State of the Nation Address (SONA) ang mga anomalya ug mga problemang gibilin sa miaging administrasyon nga gisaway sa mga militante gumikan sa mga pasangil nga kurapsyon ug pagpangabuso, naniguro ang Philippine National Police nga walay makaduol nga militante diha sa Batasang Pambansa ni Presidente Benigno "Noynoy" karong hapon.

Gituohang ang mga militante dili lamang tuyo nga momartsa aron pagpaabot sa ilang yangungo kang Aquino kun dili ang pagtambong ni kanhi presidente ug karon Pampanga Kongresista Gloria Macapagal Arroyo.

Apan si Arroyo mipahibalo nang daan nga dili siya motambong sa SONA tungod kay magpa-medical examination kini sa iyang banang si Jose Miguel Arroyo ug milarga na sa Hong Kong niadtong milabay'ng gabii.

Si National Capital Region Police Office (NCRPO) Director Chief Supt. Roberto Rosales mipahibalong dili nila tugutang makaduol ang mga demonstrador sa Batasan, kini aron usab paglikay sa kahasol sa dagan trapiko.

Matud pa sa taho sa ABS-CBN News nga gawas sa 4,000 ka mga pulis, dunay walo ka mga close-circuit television (CCTV) cameras nga giinstalar sa palibot sa Batasang Pambansa aron maseguro ang seguridad sa maong dapit.

Si Bagong Alyansang Makabayan (Bayan) secretary-general Renato Reyes nagkanayon nga hatagan nila og igong panahon si Aquino aron himuon ang iyang trabaho alang sa pagpalambo sa nasud subay sa iyang gipanaad atol sa kampanya.

Samtang ang mga kadagkoan sa Social Watch Philippines (SWP) mipadayag kagahapon nga sila naglaom nga wala untay makalimtan nga mga sektor sa pinakauna nga SONA ni Aquino. 

Matud pa ni Leonor Magtolis Briones sa SWP  nga ilang panghinaut nga sulbaron ni Aquino ang nagkadaiyang problema sa nasud nga napakyas nga mahatag sa nakalabay'ng administrasyon.

Buot sa grupo nga hatagan og pagtagad ni Aquino ang kawad-on,   edukasyon ug ang pagdumala sa pagprotehir sa kalikupan sanglit nalakip pud kini sa ilang Millennium Development Goals hangtud sa tuig 2015. Samtang ang presidente sa Philippine Rural Reconstruction Movement nga si Isagani Serrano sa samang report miingon nga minilyon gihapon sa mga Filipino ang nag-antos sa kagutom. (BANAT NEWS)