CEBU, Philippines – Usa ka mag-uuma kinsa nalingaw sa pagtan-aw og salida sa telibisyon sulod sa iyang balay gipusil angol sa wala hiilhing kriminal didto sa barangay Malolos, lungsod sa Barili niadtong Huwebes sa gabii.
Ang biktima mao si Alberto Capacity Manguilimotan, 42 , minyo, mag-uuma nga taga Barili.
Si PO3 Job Sarveda sa Barili Police mibutyag sa Banat News nga ang biktima kauban sa iyang anak nga si Marvin Manguilimotan, hingkod ang panuigon nanan-aw sa salida sa tv dihang ang wala hiilhing kriminal kalit lang nibutho ug namusil duha ka higayon.
Ang biktima naigo sa iyang sentro sa tiyan ug walang bahin sa sampot ug daling gihatud ngadto sa Barili District Hospital apan gi-transfer usab dayon sa tambalanan dinhi sa dakbayan sa Sugbo tungod sa delikadong kahimtang.
Ang kapulisan nga ni responde sa hitabo wala na makaabot sa suspek ug igo nalang kining naka recover og usa ka kabhang sa bala sa kalibre .45 nga gituohang gikan sa armas nga gigamit sa suspek.
Personal nga kasungi-an ang gitutokan karon nga motibo sa padayong imbistigasyon sa kapolisan. (BANAT NEWS)