China phones gisakmit

CEBU, Philippines – Duha ka cellshops sa dakbayan sa Sugbu ang gironda sa Criminal Investigation and Detection Group ug mga sakop sa National Telecommunications Commission diha sa dalan Colon kagahapon sa buntag gumikan sa pagpamaligya og dili selyadong mga cellphones.

Ang pagronda gihimo pinasikad sa search warrant nga giluwatan ni Judge Soliver Peras sa RTC Branch 10 tungod kay walay selyo sa NTC ang ilang mga gibaligyang produkto ug may mga mireklamong kostumer.

Ang gironda mao ang Jieri Marketing ug One GB Cellshop nga gipanag-iya nila ni Kevin Ang , Marie Engco Datalan ug Muana Zo, apan ang mga tag-iya wala madakpi.

Base sa pasiunang imbestigasyon sa CIDG nga ang mga gipamaligyang ‘China phones’ walay NTC seals nga maoy timailhang legal ang pagbaligya niini ug nakabayad og tukmang buhis sa gobiyerno.

Nakumpiska sa mga operatiba ang 642 ka mga assorted nga China phone units nga nagkantidad og dili mominus sa P600 mil.

Sa pakighinabi sa Banat News sa officer-in-charge sa NTC nga si Dennis Rocamora kini mibutyag nga kasong administratiba ang ilang ipasaka batok sa mga tag-iya sa tindahan.

Dugang pa niya nga daghan pa unya ang mga tindahan nga ilang inspeksyunon pagsusi kun misunod sila sa ilang mga requirements.

Mipahimangno siya sa publiko nga kadtong selyado lamang ug nakabayad sa buhis ang paliton sanglit garantisado kining ilahang nainspeksyon. (BANAT NEWS)