Spa, massage parlors ipa-regulate ni Radaza

CEBU, Philippines – Gitugyan ni Lapulapu City Mayor Paz Radaza ngadto sa konseho sa dakbayan sa Lapulapu ang paghimo og ordinansa nga mag-regulate sa mga spa, massage parlors ug wellness business nga nag-operate sa dakbayan sa Lapulapu.

Atol sa panagtigom nga gipatawag ni Radaza, mitambong ang mga sakop sa SPA and Wellness Association of Cebu (SWAC) pinangulohan sa ilang presidente nga si Johnie Lim ug lisensyadong Therapist nga si Maria Teresita Tatara sa International NKYR Academy (usa ka training institution alang sa mga therapist) uban nila ni Kon. Florito Pozon ang Chairman sa Committee on Laws ug Dr. Cornelio Pahang ang Chairman sa Committee on Health.

Matud ni Radaza magsentro kini sa pagpangita og solusyon sa pagsulbad sa massage clinics nga nakalapas sa balaod ug nagtanyag og “lingam services” ngadto sa ilang mga customer.

Si Lim mipadayag nga lakip sila sa SWAC wala sila mahimuot sa mga establisamentong nagtanyag sa “lingam services” gumikan kay makadaot kini sa ilang imahen ug sa nasud.

Ang mga langyaw’ng kalalakin-an maaghat sa pag-anhi sa nasud gumikan sa maong klase sa serbisyo sa mga wellness centers nga gipanglantawang susama ra nga usa ka front sa prostitusyon.

Gumikan niini giawhag ni Lim ang tanang mga nanag-iya og susamang negosyo nga moagi una ngadto kanila sa dili pa kini mokuha og Business Permit aron ilang ma-monitor ang operasyon niini kung nagsubay ba kini sa ensaktong lagda nga gitugot sa DOH.

Si Tatara sa iyang bahin mipadayag nga kulang gyud sa mga lisensiyadong therapists ang lalawigan sa Sugbu gumikan sa kamahal sa gasto sa pagkuha og License Massage Therapist o LMT usa ka Board exam alang sa mga therapists nga didto lamang sa kaulohan ipahigayon.

Matud pa ni Tatara nga ila nang gihangyo ang DOH nga mohimo og LMT examination dinhi sa Sugbu matag tuig, apan kini magdepende nalang unya sa bag-ong administrasyong Aquino. (BANAT NEWS)