Totol dako'g matabang sa BRT- Tom

CEBU, Philippines –  Gihangop ni Cebu City South District Kongresista Tomas Osmeña ang pagkatudlo ni Atty. Aristotle Batuhan isip undersecretary sa Department of Transportation and Communication kon DOTC.

        Matud pa ni Osmeña nga dako kaayo og ikatabang si Batuhan sa kagamhanan sa siyudad sa Sugbu tungod kay dili na kaayo subidahon ang dugay na niyang gitinguhang proyekto nga Bus Rapid Transit (BRT).

        Si Osmeña nagkanayon nga dili na siya kinahanglan pa nga mosikit sa pipila ka mga dagkong opisyales sa Malacañang alang sa katumanan sa maong proyekto sanglit anaa na man si Batuhan.

        Nasayran nga si Batuhan mipadayag na kaniadto nga iyang suportahan ang BRT project sa kanhi mayor sa dakbayan nga si Osmeña.

        Samtang ang Kapitolyo pinaagi sa buhatan ni Gob. Gwendolyn Garcia mihangop usab sa katungdanan ni Batuhan tungod kay lain na usab kining garbo sa mga Sugbuanon nga makalingkod og posisyon sa Malacañang ubos sa administrasyon ni Presidente Benigno Aquino III.

        Usa sa opisyales sa Provincial Planning and Development Office nga mihangyong dili magpahingalan miingon nga si Batuhan mipakita usab og interes sa Light Rail Transit (LRT) project nga giduso ni 1st District Kongresista Eduardo Gullas. (BANAT NEWS)