CEBU, Philippines – Duha ka ‘fixers’ sa DFA gidakop, usa kanila kawani sa maong ahensy Duha ka lalaki usa kanila kawani sa Department of Foreign Affairs ang nasikop gumikan sa kalapasan sa Republic Act 9485 kon kalapasan sa Anti-Red tape law.
Ang gidakop mao sila si Jay Ytang, 34, giingong supervisor sa tourism services ug tag-iya sa Jetsetters Travel and Tours, Incorporated ug si Harvey Garcia nga giingong dugay nang gitaktak sa maong ahensya apan namaligya na og mga cover sa passport sa gawas nga bahin sa maong buhatan.
Nasayran nga ang kapolisan sa Waterfront Police Station nakadawat og usa ka suwat gikan sa usa ka Cynthia Tecson Recaplaza, ang officer in-charge sa nahisgutang buhatan kalabot sa mga daghang fixers gawas sa ilang buhatan hinungdan nga mipahigayon sila og entrapment operation batok sa maong mga fixers.
Usa ka babayeng asset sa kapolisan ang nagpakaaron-ingnong naghikay og passport nga nagbarog-barog diha sa gawas sa maong buhatan ang giingong giduol ni Garcia.
Sa pakighinabi sa Banat News kang Garcia ug Ytang hugtanon nilang gipanghimakak nga sila mga fixers.
Si Garcia miangkon hinuon nga dihay usa ka babayeng nagpunay og basa sa bulletin sa gawas nga bahin sa DFA nga iyang giduol ug gipangutana kun mokuha kini og passport.
Matud pa niini iyang gitug-anan ang maong babaye nga ang application dawaton lang sa buntag kay sa hapon ang mga travel agencies mao nay motabang sa mga tawo nga mahaponan og kuha og passport.
Sumala pa niya nga gihatagan usab niya og mga listahan sa mga travel agencies nga accredited sa DFA ang maong babaye apan naatol usab nga miagi sa ilang duol si Ytang.
Tungod kay nakahibalo siyang si Ytang adunay travel agency iyaha kining gitawag ug gitug-anan sa problema sa maong babaye.
Si Ytang sa iyang bahin mibutyag nga ang maong babaye iyang gipahibalong ang pagproseso sa aplikasyon sa passport mokantidad og P1,600 apan mahimong katunga lang una ang iyang bayran ug ang kuwang ini na og release sa passport.
Sumala pa niya nga iyaha untang pasudlon ang maong babaye sa ilang buhatan aron adto mag-file apan wala kini tuguti sa mga gwardiya kay nag-tsinelas ra kini hinungdan nga gihatagan nalang niya og porma sa ilang travel agency.
Wala masayod ang duha nga ang maong babaye kabahin diay sa entrapment operation sanglit dihang mibayad na kini og upat ka marked money nga P200 gidakop dayon sila sa kapolisan.
Matud pa ni Ytang nga dako ang iyang katingala nganong gisikop siya nga wala man siya’y gibuhat nga dautan kay igo raman siya niadtong tungora magpapirma og porma sa ilang travel agency aron iyang mahatag ngadto sa ilang opisina. (BANAT NEWS)