Mga vendors mag-piket

CEBU, Philippines - Ang Cebu City United Vendors Association mibahad paglusad og piket atubangan sa City Hall karong umaabot nga Hulyo 26 ug modangop sa Ombudsman aron ipakita ang ilang pagsupak sa proyekto ni Mayor Michael Rama nga “One Side Vending.”

Kini human ang dakbayan nagsugod na og pagpangguba sa mga gagmay’ng mga estante sa mga vendors diha sa dalan Colon agi og pagpanindot sa gihulagway nga bati kaayong itsura sa kadalanan tungod niining mga paninda.

Apan sa pakighinabi sa Banat News sa pipila ka mga manindahay sa Colon sila mihangop sa proyekto sa mayor apan nahiubos sila kay sa sulod sa 30 kapin ka tuig nilang pagpaninda, karon ra nahitabo nga sila gipapahawa.

Gihulagway nilang dili gyud patas ang gibuhat nga demolisyon gumikan kay wala sila pahibaw-a ug padad-i og notisya nga sila papahawaon.

Ang presidente sa Power United Vendors nga nagdumili pagpaila sa iyang pangalan nagkanayon nga nakigkita na sila sa mayor apan hangtud karon walay komento si Rama ug wala gani sila sultihi kun duna silay kabalhinan. – BANAT NEWS