CEBU, Philippines - Si Gob. Gwendolyn Garcia mibahibawo kagahapong adlawa nga ang iyang kagamhanan sa lalawigan sa Sugbu bukas na usab sa pagpakig-negotiate sa kagamhanan sa siyudad sa Sugbu aron mahatagan og kasulbaran ang problema sa 4 mil ka mga pamilya sa 93-1 nga lote.
Matud pa ni Garcia nga nakadesisyon siyang makigsabot sa mga opisyales sa siyudad tungod kay dili na man si South District Kongresista Tomas Osmeña ang mayor sa siyudad kun dili si Mayor Michael Rama na. Si Garcia miangkon nga ang laing nakaaghat kaniya sa pagbuhi sa negosasyon sa isyu sa 93-1 mao ang pagsaway ni Osmeña sa iyang suod nga higala nga si Mariquita Salimbangaon Yeung ang igsuon ni 4th district Kong. Benhur Salimbangon.
Kini tungod lamang sa pagtudlo ni Rama kang Mariquita nga mangulo sa Superbody Beautification Commission nga gikwestyon ni Osmeña kay si Mariquita dili man taga siyudad sa Sugbu.
Sigon pa ni Garcia nga magpaabot siya sa tubag ni Rama sa dili pa siya mohimo og lakang.
Gihulagway sa gobernadora nga komplikado ang maong isyu ug dili madali pagsulbad sanglit daghan pa kaayo ang wala nakahuman sa pagbayad sa lote samtang ang uban wala gyud namayad.
Samtang giklaro ni Garcia nga karon ang tukmang panahon nga mahibaw-an sa publiko nga ang nagsugod sa kontrobersiya dili si Rama kondili si Osmeña. – BANAT NEWS