Anak sa bokal gikiha na

CEBU, Philippines - Gipasakaan na og kaso sa kapolisan sa lungsod sa Argao kagahapon ang anak ni kanhi 2nd district board member Antonio Almirante Jr. nga nakapusil patay sa igsuon niini niadtong Martes sa buntag didto sa balay sa ilang ginikanan sa sitio Suba sa barangay Poblacion.

Si Sr. Supt. Erson Digal, hepe sa kapolisan sa lalawigan miingon nga ang kasong murder nga ilang gipasaka batok ni Antonio Almirante III base sa circumstancial evidence nga ilang natigom kabahin sa kamatayon ni Allan.

Si Allan, 49, namatay human mapusili og 9mm pistol ug nakaangkon og tulo ka samad pinusilan sa tiyan ug duha sa dughan nga maoy gituuhang nakaingon sa iyang hinanali nga kamatayon.

Iyang gipasabot nga tungod sa kakuwang sa koordinasyon sa pamilyang Almirante sa wala na pagpakita sa kapolisan sa Argao mao nga ila nalang gipasaka ang kasong murder kagahapon sa hapon.

Matud niya ilang gisumiter nga ebidensya mao ang Death Certificate, Medical Certificate ug autopsy report, paraffin test ug ang affidavit sa mga polis nga miresponde sa crime scene.

Samtang kabahin sa armas nga hangtud karun wala gyud marekober sa kapolisan, nagkanayon si Digal nga lisud nang utingkayon ug pangitaon ang armas nga gigamit pagpusil.

Sa iyang bahin si Sr. Insp. Raynan Tolentin, hepe sa kapolisan sa Argao miangkon nga naglisod sila tungod kay walay usa sa pamilya ang mipakita kanila aron pag-execute og affidavit.

Gani giangkon ni Tolentin nga huyang gyud ang kasong ilang gipasaka tungod sa kakuwang usab sa mga ebidensya nga makapalig-on sa kaso.

Si Digal miingon hinuon nga murder ilang gipasaka nga kaso batok ni Antonio ug depende na kana sa korte kun i-downgrade ngadto sa Homicide ang kaso. – BANAT NEWS