Credit Officer sa CCMC gisuspenso

CEBU, Philippines - Gisuspenso og 30 ka adlaw ang credit officer sa Business and Finance Department sa Cebu City Medical Center nga gipasanginlang maoy nag-release sa 28 ka tseke sa Philippine Health Insurance niadtong Mayo 4 samtang nagpadayon pa ang imbestigasyon.

Ang maong credit officer giilang si Ma. Lourdes Archua kinsa giimbestigar sa kasong administratibang gross neglect of duty sa pagsupak sa Code of Ethics sa Cebu City Employees and Civil Service Rules and Regulations.

Gitagaan hinuon og lima ka adlaw sa pagsumiter sa iyang tubag ug dugang ebidensiya aron maghimakak sa maong pasangil.

Si Cebu City Mayor Michael Rama mimando kang Cebu City legal officer Joseph Bernaldes nga paspasan ang imbestigasyon.

Si Bernaldes mitug-an nga makig-alayon sila sa National Bureau of Investigation aron mas mapadali ang pagtigom og dugang ebidensiya sa maong pasangil.

Gawas kang Archua gitun-an usab ang posibilidad nga apilon sa pagsuspenso ang mga kaubanan niining empleyadong may kalambigitan sa maong hitabo.  - Joann Cristine Surigao ug Denky Catanda (BANAT NEWS)