Laing taxi driver gitulis gipatay

CEBU, Philippines - Napalgang naligo sa kaugalingong dugo ang usa ka drayber sa taksi nga giulo pagpusil sa wala pa mailhing mamumuno sa sitio Upper Tingob, dakbayan sa Mandaue alas 2:30 ang takna sa miaging kaadlawon.

Ang biktima mao si Modesto Gelegao, 38, taga barangay Pulpogan sa lungsod sa Consolacion ug drayber sa taxi nga nagdala sa plate number GXD 642 ug nagdala sa body number nga 3478.

Kini maoy ikatulong drayber sa taxi nga gipatay sulod lang niining bulana ug ikaduha karong semanaha human sa pagpatay sa laing taxi driver nga si Alberto Resus diha sa Kinasang-an, Pardo.

Si Rupino Gelegao, 42, igsuon sa biktima maoy miila sa patay’ng lawas nga nakabaton og samad pinusilan luyong bahin sa ulo ug milapos sa agtang ug milahos pa sa windshield sa taxi unit niini.

Ang team sa kapolisan homicide section nga naglakip kanila ni PO3 Joselito Catabas, PO2 Cristito Raboy ug mga kauban nga misusi sa patay’ng lawas sa biktima sa sulod sa gimanehong taxi nakakaplag sa P1,700 nga salapi sa biktima nga diha pa sulod sa pitaka uban sa lisensiya niini.

Si Inspector Ramil Morpos, hepe sa Investigation Detection and Management Bureau (IDMB) sa Mandaue City Police Office (MCPO) nga maoy nangulo sa imbestigasyon nagkanayon nga sutaon pa nila ang motibo sa pagpusil patay sa biktima.

Kini gumikan kay anaa pa sa biktima ang iyang salapi hinungdan nga nagduda sila kun gitulis ba kini ug misukol maong gipatay o ba kaha personal ang motibo.

Si Sr. Insp. Rex Lomente, hepe sa kapolisan sa Presinto 3 sa MCPO dihang nahinabi sa Banat News miingon nga adunay mga drayber sa taxi nga gitulis ug gipatay ug ang mga suspetsado nga napasakaan na og kaso ang pabilin pang gawasnon. (BANAT NEWS)