FTP nga napusilan sa kauban namatay

CEBU, Philippines - Aksidente gyud ang nahitabong pagkapusil sa usa ka Field Training Program nga polis sa iyang kaubang iyang napatay atol sa pagduwa-duwa nila og armas samtang nag-inom sa ilang boarding house diha sa Pahina-Central niadtong Lunes sa gabii.

Sa gipahigayong imbestigasyon sa kapolisan sa Cebu City Police Office Homicide Section ug base usab sa mga pamahayag sa mga nakasaksi aksidenti ang pagkapusil ni PO1 Ronie Barangian kang PO1 Ronnie Barrita.

Matud pa sa hepe sa Homicide Section nga si Supt. Vicente Velasquez nga bisan pa og aksidenti ang nahitabo ilaha gihapong pasakaan og kasong homicide si Barangian.

Base sa affidavit ni PO1 Mari June Balasabas Bohol kinsa diha sa pagkahitabo mao pay pagdawat niya sa iyang salary loan ug mibangka siya og duha ka botelyang beer.

Matud pang Bohol si Barrita ug si Barangian nagduwa-duwa sa ilang mga service firearms duol sa hagdanan ug iyang nakit-an si Barangian nga mition niini ngadto sa liog ni Barrita.

Giingong si Barrita misulti pa og “sige kablit sano” ug kalit lang nilang nadungog ang buto ug nahagba si Barrita dayon nadunggan nila ang biktima nga nangutanang “nganong gikablit man nimo Sano?”

Si Barrita nakabsan sa kinabuhi diha sa Cebu City Medical Center human sa pila ka oras nga pagtabang kaniya sa mga doktor.

Si Chief Supt. Lani-O Nerez, direktor sa Police Regional Office-7 nasagmuyo sa gibuhat ni Barangian gumikan kay bag-ohay palang man unta sila ipailawom sa gun safety seminars.

“Very basic na sa gun handling nga dili gyud magduwa-duwa sa armas. Very basic na nga dili nimo ition sa imong kauban naa may bala o wala. Imo gyud na siya tan-awon kay very basic na. Nagpasabot lang nga wala gyud masulod sa ilang utok ang gitudlo kanila,” matud pa sa nasagmuyong heneral.

Sumala pang Nerez nga ang nahitabo angayang kapanaminan sa ubang polis isip usa ka leksyon aron kanunay nilang ibutang sa ilang ulo ang safety.

Si Barangian dihang gikuhaan og pamahayag miangkong aksidente gyud ang tanan ug wala niya tuyoa ang nahitabo.  (BANAT NEWS)