CEBU, Philippines - Upat ka polis sa dakbayan sa Mandaue nag-atubang karon og kaso human mokiha ang duha ka tawo nga ilang gibalhog sa prisohan nga walay gisang-at nga kaso sulod sa 60 oras.
Ang maong mga polis mao sila si Sr. Ins. Rex Binarao Lumente, Jorge Ente, Romel Uy, ug Arnold Arcipe nga sakop sa Mandaue City Police Office.
Ang mga kihante mao sila si Dante G. Librea ug Jesus A. Ebarra, mga trabahante sa Chagrin Inc. nga gipriso sa nahisgutang mga polis gikan niadtong Sabado, Hulyo 17, hangtod niadtong Martes Hulyo 20.
Ang kihang gipasaka sa maong mga kihante batok sa maong mga polis mao ang conspiracy in committing grave threats, illegal discharge of firearms ug physical injuries.
Matud pa ni Librea ug Ebarra nga gipasanginlan silang nagkupot og armas de fuego apan walay kamatuoran ang maong mga pasangil. (BANAT NEWS)