Drayber sa traysikad gitusak og kutsilyo

CEBU, Philippines - Natusak sa mga samad dinunggaban ang lawas sa usa ka drayber sa traysikad dihang giluba kini human kulataha sa iyang mga silingan sa sitio Tugas, barangay Mambaling, ning dakbayan sa Sugbo sa miaging gabii.

Ang biktima mao si Alberto Medina, 24, drayber sa traysikad , nga taga Mambaling, samtang ang mga suspetsado mao sila si Eric Odiang alyas Ikbot, ug Jun-jun Alimar, alyas Baboy, pulos hingkod, ug mga silingan sa biktima.

Sumala sa kapolisan nga sa sayo pa nag-inom ang biktima ug ang mga suspetado sa usa ka tindahan sa ilang lugar dihang kalit lang silang nagkalalis.

Gumikan sa mando sa bino dali kaayong misilaob ang maong lalis hangtod nga gitabangan og kulata sa mga suspetsado ang biktima.

Wala pa matagbaw, usa sa mga suspetsado milanit og kutsilyo ug gitusak sa paghansak ang lawas sa biktima.

Dihang nalukapa na kini sa yuta uban sa mibanaw nga dugo, gibiyaan kini sa mga suspetsado kinsa misibat pahilayo sa maong lugar.

Gihatod dayon ang biktima ngadto sa Cebu City Medical Center samtang gipangita pa sa kapolisan ang mga suspetsado. (BANAT NEWS)