Sikyu giiloga'g armas

CEBU, Philippines - Nagtibi ang usa ka security guard human kini ilogi sa iyang armas de fuego sa tulo ka wala hiilhing sakop sa agaw armas gang didto sa sitio Sangi, barangay Tabunok, dakbayan sa Talisay kagahapon sa kaadlawon.

Ang biktima mao si Vicente Cesar Senulan sa Misda Security Agency ug siyay nagbantay sa Decalidad Pawn Shop sa Sangi.

Ang biktima nga nagtibi nga misumbong ngadto kang PO1 Jundave David sa Talisay City Police Station nagkanayon nga naglingkod siya niadtong higayona dihang may tulo ka tawong wala hiilhi nga miduol kaniya, diin usa kanila nagtion og kutsilyo kaniya samtang usa usab ang nagtion og armas de fuego.

Gimandoan dayon siyang dili palihukon kay armas ray ilang tuyo.

Busa wala siya molihok ug gihulbot sa usa sa tulo ang iyang armas gikan sa holster niini dayong biya sa maong lugar.

Walay nahimo ang biktima gawas sa pagsumbong ngadto sa kapolisan. (BANAT NEWS)