Gipatay sa kainom

CEBU, Philippines - Gibuk-an sa ulo ang usa ka 37-anyos nga lalaki sa iyang kauban sa inom dihang nangahubog na ug nakatulog sa lantay nga kawayan diha sa barangay El Pardo lungsod sa Boljoon niadtong Martes sa alas 7:30 sa gabii.

Ang biktima mao si Harold Oliveros Gorabel, 37, molupyo sa maong lugar samtang ang suspek mao ra usab ang iyang barkada nga si Benito Niere Cesuelos, 39, molupyo gihapon sa maong lugar.

Matud ni SPO4 Cristino Uraca ang luyo luyong hepe sa Boljoon Police dihang nahinabi sa Banat News nag-inom kini ug nag-videoke sa tindahan sa usa ka Gabriel Paragsa.

Apan sa dihang nangahubog na mipauli ang suspek human apasa sa iyang iyaan samtang wala na makapauli ug didto makatulog sa lantay nga kawayan ang biktima. Sumala pa ni Uraca base sa pamahayag sa mga saksi ilang nakit-an ang suspek nga mibalik kini ug nagsul-ob og wig dala ang wala matinong kalibre sa armas ug gidiretso og duol ang biktima ug gidul-itan og pusil ang ulo ug abaga niini tulo ka higayun.

Samtang ang suspek nadakpan atol sa gihimong hot pursuit operation. Padayon pa pagtino ang kapolisan sa motibo sa krimen. (BANAT NEWS)