Operations manager giunay pagpusil sa iyahang gwardiya

CEBU, Philippines - Patay on the spot ang usa ka operations manager sa usa ka security agency human kini giunay og pusil sa iyang gwardiya human mogawas sa arrival section sa Mactan Cebu International Airport kagahapon sa hapon.

Ang biktima mao si Sebastian Abne, Operations Manager sa Mustang Security Agency nga maoy nag-deploy og mga gwardiya sa maong tugpahanan.

Samtang gitumbok nga mipusil mao si Jessie Jumadiao, sakop gihapon sa biktima.

Base sa pasiunang imbestigasyon ni Maj. Bonifacio Pusta ang hepe sa Air Police Division sa MCIAA nga mga alas 3:00 kagahapon sa hapon nag-abot ang duha sa arrival section ug nagkalalis.

Gikatahong migawas ang biktima apan pag-abot diha sa luyong bahin sa usa ka dakong hotel diha gihapon sa palibot sa MCIA kalit nga gipusil ni Jumadiao si Abne gamit ang service firearms niini nga 9mm pistol.

Si Abne nga naigo sa iyang tangkugo ug ubang parte sa lawas namatay diha-diha ug wala na madala pa sa tambalanan.

Si Jumadiao bulontaryong mitahan sa iyang kaugalingon ngadto sa mga sakop sa Air Police uban sa iyang armas.

Matud pa ni Pusta nga atol sa ilang imbestigasyon, daan na nga adunay panagbangi ang duha tungod kay adunay bayrunon ang suspek sa ilang training.

Itugyan unya nila si Jumadiao sa Lapulapu Police detention cell samtang nagpadayon ang ilang imbestigasyon ug nangandam sa kasong murder nga ilang ipasaka. – BANAT NEWS