FTP naunay sa kauban

CEBU, Philippines - Usa ka polis nga nag-Field Training Program naangol ug talandugon ang kahimtang human maunay sa armas sa kaubang FTP pulis atol sa ilang panag-inom pasado alas 10:10 sa milabay’ng gabii diha sa dalan Sanciangko sa barangay Pahina Central.

Ang biktima giilang si PO1 Ronnie Barreta, 27, nga nadestino sa Task Force Colon ug molupyo sa Nivel Hills sa barangay Lahug, samtang ang suspetsado mao si PO1 Ronie Barangian, 25, nga nadestino usab sa Centralized Beat Patrol ug kasamtangang nagpuyo sa La Paloma Village, barangay Tisa ning dakbayan sa Sugbo.

Sa pakighinabi sa Banat News kang PO3 Jeffrey Gutual sa Homicide Section kini mibutyag nga nag-inom ang duha sa sala sa ilang boarding house dihang nahitabo ang aksidente.

Matud pang Gutual nagduwa ang duha sa ilang kalibre .45 pistola nga gipanag-iya ni PO1 Barangian apan kalit niya kining nakablitan ug naigo sa liog si Barreta nga milapos diha sa tangkugo.

Si Barreta daling gidala sa Cebu City Medical Center samtang mitahan si Barangian.

Si Chief Supt. Lani-O Nerez mibutyag nga iyaha gyung ipatangtang sa pagkapolis si Barangian gumikan kay gidili gyud sa mga polis ang pag-inom-inom ilabi na kun magdala-dala og armas.   – Rey Pasaporte ug Cherlie Domecillo ug Joann Cristine Surigao(BANAT NEWS)