Anak sa bokal gipatay sa manghod

CEBU, Philippines - Patay ang anak ni kanhi board member Antonio Almirante human giunay pagpusil sa manghod makatulo ka higayon diha sa balay sa ilang ginikanan kagahapon sa alas 9:30 sa buntag diha sa sitio Suba sa barangay Poblacion sa lungsod sa Argao.

Dead on the spot ang biktimang si Allan Almirante IV, 49, human mahiagom og tulo ka samad pinusilan sa tuong bahin sa tiyan ug duha sa ibabaw’ng bahin sa dughan ginamit ang .9mm nga kalibre sa armas.

Ang gitumbok nga suspetsado mao ra usab ang manghod niining si Antonio III Alias “Junjun” Almirante nga nagpuyo ra usab sa maong lugar.

Si SPO1 Arnold Abenir, imbestigador sa kapolisan sa Argao nga gikahinabi sa Banat News nagkanayon nga subay sa ilang imbestigasyon ang biktima nakainom niadtong higayona nga miabot sa balay sa ilang ginikanan.

Matud ni Abenir nga nanghagis ang biktima nga nagbitbit og kutsilyo nga may gitas-ong unom ka pulgadas ug gihagit ang suspek nga pagawason sa iyang lawak.

Si Junjun mitug-an kang Abenir nga mikuha siya sa 9mm nga pistola aron unta hadlukon ang maguwang apan wala gyud madala bisan pa kun gikasa niya ang armas aron unta moatras apan miatake hinuon kini kaniya duol sa kusina hinungdan iya kining gipusil.

Matud ni Abenir ang mga katabang mitug-an usab kaniya nga bisan sa wala pa ang hitabo kagahapon, kanunay nang manghagis si Allan kun mahubog bisan og kaadlawon.

Narekober sa kapolisan sa crime scene ang kutsilyo diha sa posisyon sa biktima ug ang tulo ka basiyo sa bala nga .9mm apan ang armas nga gigamit sa suspek wala na marekober sa kapolisan.

Si Junjun mitug-an nga lisensyado ang armas apan siya miingon sa kapolisan nga wala na siya makabantay si kinsa ang mikuha sa maong armas human sa hitabo.

Atol sa maong hitabo, matud ni Abenir ang igsuon, inahan ug mga pag-umangkon mao lamang ang diha sanglit ang amahan niini wala diha kay dunay gitambongan nga hearing sa lungsod sa Argao.

Matud pang Sr. Supt. Erson Digal, hepe sa kapolisan sa lalawigan personal nga mibisita kagahapon sa crime scene Argao. Si Junjun sa dihang gikahinabi sa mga tigbalita sulod sa detention cell sa Argao mitug-an nga wala na gyud siya makaagwanta niadtong higayona ug napuno na ang iyang pasensya maong iyang gipusil ang iyang maguwang.

Gani siya midugang nga dili lang kadto maoy unang higayon nga gibuhat sa iyang maguwang, sanglit sa high school pa sila kanunay na siyang bikil-bikilon niini.

Si Digal nagkanayon nga bisan tuod og giangkon sa suspek nga siya maoy mipusil sa iyang maguwang apan ila pang tun-an og maayo kun unsay kaso nga ilang ipasaka batok sa suspek sanglit nagpaabot pa sila sa resulta sa medico-legal nga mohiling sa patay’ng lawas sa biktima.

Si Annabel, konsehal sa lungsod sa Argao ug igsuon sa duha miingon nga sa pagkakaron wala pa silay plano sa kaso sanglit anaa pa sila sa state of shock human sa hitabo.

Ang ilang amahan nga si Antonio Almirante nahimong mayor kaniadto sa maong lungsod sa panahon pa ni kanhi Ferdinand Marcos dayon nahimong board member sa ikaduhang distrito sa lalawigan sa dihang si Wilfedo Caminero na ang nahimong mayor sa lungsod sa Argao.   – BANAT NEWS