CEBU, Philippines - Gihangop sa buhatan ni Gob. Gwendolyn Garcia ang sugyot ni Bise Gob. Gregorio Sanchez nga nag-awhag kaniyang ipaubos sa road proficiency test ang tanang mga sakyanan sa kagamhanan sa lalawigan sa Sugbu.
Matud pa ni Capitol Consultant on Information Rory Jon Sepulveda usa ka maayong sugyot ang gihimo ni Sanchez ug dili kini balibaran sa gobernadora sanglit ang katuyoan niini mao nga malikayan ang pagkadisgrasya sa mga sakyanan sa gobiyerno.
Si Sanchez misugyot niini gumikan sa mga nagsunod nga mga aksidente sa kadalanan sa lalawigan nga mikalas na og kapin sa 40 ka kinabuhi sa milabay’ng buwan.
Si Sepulveda mitumbok hinuon nga ang mga sakyanan sa kagamhanan sa lalawigan ang gipaubos gyud sa Provincial Engineering Office sa regular nga Preventive Maintenance Schedule agi og pagtuman sa sugyot sa manufacturers.
Matud pa ni Sepulveda nga dili usab angayang mabalaka ang bise gobernador kay halos tanang mga sakyanan karon sa kagamhanan sa probinsiya sa Sugbu, mga bag-o pang napalit.
Samtang giklaro usab ni Sepulveda ang mga drayber sa Kapitolyo gipaubos og mga trainings ug seminars pagpuno sa ilang abilidad sa pagmaneho. – BANAT NEWS