Bag-ong gibuhian sa polis gipatay

CEBU, Philippines - Gipusil patay ang usa ka gipasanginlang tulisan nga bag-ohay lang gibuhian sa kapolisan gikan sa ilang detention cell diha atubangan sa City Hall sa dakbayan sa Lapulapu niadtong milabay’ng gabii.

Ang gipusil patay mao si Emanuel Derota, 24, residente sa Poblacion dakbayan sa Lapulapu human kini giatangan og upat ka mga lalaki diha sa iyang agianan human makagawas sa karsel.

Matud pa ni SPO2 Rolito Jumao-as ug SPO3 Rex Ibañez sa Crime Against Persons Desk nasayran nga sa milabay’ng Sabado sa kaadlawon petsa 17 ning bulana si Derota misaka sa usa ka panimalay ug nangawat og cellphone.

Apan nailhan kini sa biktima hinungdan sa iyang pagkasikop sa mga tanod uban ni Poblacion barangay Kapitan Allen Demataga ug gi-turnover sa kapolisan.

Hangtud Lunes wala kini mapasakai og kaso hinungdan nga gibuhian kini sa kapolisan nianang pagka-alas 7 pasado sa gabii aron paglikay nga silay makasuhan.

Apan pipila palang ka metros gikan makagawas sa gate sa LCPO headquarters diha sa atubangang bahin sa Lapulapu City Hall duha ka motorsiklo nga may luwang upat ka mga lalaki nga nag-itom og sinina ang kalit nga mipusil sa biktima.

Sa dihang nahagba na si Derota usa sa suspetsado ang mikanaog ug gitiwasan ang biktima pagpusil sa ulo. Si Derota napusilan lima ka higayon diha sa ulo, ug duha sa bukobuko.

Patay na kini pag-abot sa tambalanan, samtang dali usab nga nakapahilayo sa maong dapit ang mga suspetsado.

Usa ka pulis nga nakasaksi sa maong hitabo ang misuway sa pagpusil sa mga gikatahapan apan wala kini makaigo ug sa dihang gigukod kini nagbulag ang duha ka motor pahilayo, ang usa padulong sa unang taytayan ug ang laing motorsiklo padulong sa ikaduhang taytayan sa Mactan Mandaue Bridge.

Nasayran gikan sa kapolisan nga si Derota aduna nay daghang kaso sa pagpangawat ug magsulod-gawas na kini sa karsel ug nabilanggo na usab kini sa Muntinlupa New Bilibid Prison. – BANAT NEWS