Druglords Miduol Na og Mga Kandidato

CEBU, Philippines - Gipanid-an karon sa Philippine Drug Enforcement Agency-7 ang mga barangay nga dako ang problema sa ilegal nga drugas nunot niining nagsingabot nga Sangguniang Kabataan ug Barangay elections karung buwan sa Oktubre.

Ang tigpamaba sa Philippine Drugs Enforcement Agency (PDEA-7) nga si Jessie Tabanao nagkanayon nga duna na silay mga nadawat nga impormasyong ang mga drug personalities sa kabarangayan hinay-hinay na usab mipaduol sa mga barangay officials ug niadtong mga nagpadungog-dungog nga mokandidato.

Sumala pang Tabanao nga pundo alang sa kampanya maoy unang gisaad niining maong mga drug personalities ngadto sa mga nangambisyon og posisyon sa barangay.

Matud ni Tabanao ang kandidatong makadaog inabagan sa drug money gipaabot nga mohatag gyud og pabor ngadto sa mga nakatabang kanilang druglords. (BANAT NEWS)