Payroll, Kabtangan Nadala Sa 5 Tulisan
CEBU, Philippines - Payroll money ug kabtangan sa mga empleyado sa usa ka kompanya sa pagkaon sa barangay Tungkil lungsod sa Minglanilla niadtong Domingo sa alas 3:45 sa hapon nasakiyo sa lima ka tuligan.
Ang mga biktima mao sila si Jennybee Pardillo, 25,cashier sa nahisgutang kompaniya, May-ann Ubas Gotang, 18, operator, Maricel Melgazo, 28, inventory control operator, Theresa Cañete Taypin, 22, supervisor sa maong kompaniya ug ang gwardiya nga si Jurex Reyes nga kawani sa Ming Food World Company.
Matud ni PO1 Raymund Hortezuela sa Minglanilla Police nakasulod ang lima ka wala mailhing tulisan human ablihi sa gwardiya ang gate sa pagtuong dunay tuyo ang lima diha sa ilang kompanya.
Sumala pa ni Hortezuela sa Banat News nga unang nakabantay ang gwardiya og mga empleyado diha sa gawas nga padulong sa sulod pinaagi sa ilang close circuit television (CCTV) camera hinungdan nga iya na untang ablihan.
Apan aduna diay usa sa lima ka tulisan nga nanuktok diha sa gate ug dihang iyaha nang giablihan nangutana pa kini kun naa ba ang cashier nga si Jennybee, wala pa siya makatubag kalit gitukmod sa maong lalaki ang gwardiya.
Dihang natumba ang gwardiya misulod dayun ang tulo ka suspek nga armado og wala matinong kalibre sa armas ug ang duha nagsilbing lookout ug gitionan og armas ang gwardiya.
Ang tulo daling mitulis sa kahera sa P40,230 nga payroll money, laing cash nga P4,854 personal nga kwarta sa mga kawani, tulo ka cellphone ug usa ka digital camera sa kompaniya nga mokantidad og P40,000.
Ang mga tulisan daling nakasibat pahilayo sakay sa duha ka motor nga nag-angkasay,ang kapulisan padayon pa sa ilang operasyon pag-ila ug pagsikop sa mga tulisan. (BANAT NEWS)
- Latest
- Trending
