401 ka punoang marijuana giibot

CEBU, Philippines - Mikabat sa 401 ka hamtong nang mga punoan sa marijuana ang gipanglarot sa hiniusang team sa kapolisan ug military didto sa barangay Magtagobtob, dakbayan sa Danao niadtong Domingo sa buntag.

Matud pa ni PO2 Marlon Remollo sa Danao City Police Station nga ang pagpangibot nila sa maong mga illegal nga tanom nahimo human nila kini makita sa kalibonan nga ilang giagian samtang naghatod sila og orden de aresto batok kang Ronald Batican didto sa Magtagobtob.

Dihang gisusi nila ang maong tanom, nasuta nilang anihunon na kini busa nakahukom silang pangibton ug gidala nila ngadto sa headquarter sa kapolisan sa lalawigan.

Wala silay nadakpang tag-iya sa maong mga tanom sanglit walay mitug-an kun kinsay nananom niini. - Darrel A. Carrumba (BANAT NEWS)