Nagluklok og revolver sikop

CEBU, Philippines - Nasikop sa mga polis ang usa ka 21-anyos nga lalaki human kini masakping nagluklok og revolver, didto sa sitio Mananga, barangay Tabunok, dakbayan sa Talisay sa miaging gabii.

Ang suspetsado mao si George Tabay, nga taga sitio Crossing, barangay Camp 4 sa maong siyudad, kinsa gidudahan usab sa mga polis nga nalambigit sa mga tulis sa Mananga.

Nabaniog na kaayo ang Mananga nga paborito kaayo sa mga tulisan sa mga jeep pasaheroan.

Nasakmit nila ni PO1 Jessie Ben Gumandal, PO1 Christian Putalan ug PO1 Ariel Banal ang usa ka kalibre .38 nga revolver nga may tulo ka buhing bala gikan kang Tabay.

Si PO3 Edwin Alvaro, desk officer sa Talisay City Police Station nga nahinabi sa Banat News mibutyag nga ang tulo ka nahisgutang polis nagpatrolya nianang alas 10:00 ang takna sa gabii didto sa Mananga dihang naagian nila si Tabay nga naglakaw kansang hawak nagbagal.

Diha-diha gisita dayon kini sa mga polis pinaagi sa pagpa-isa sa iyang t-shirt , ug didto nagbansiwag ang gitangkil niining revolver.

Gumikan sa kapakyas niya pagpakita og mga papeles sa iyang armas, dihadiha gisikop dayon kini sa mga polis.

Matud ni Alvarado nga natahap silang si Tabay nalambigit sa mga nahitabong tulis sa Mananga busa giawhag nila ang mga nabiktima sa tulis nga moduaw sa ilang prisohan ug sud-ongon kun ang suspetsado mao bay mibiktima kanila. - Brenda D. Batuto (BANAT NEWS)