Australian gipadakop sa misis

CEBU, Philippines - Usa ka Australiano ang gipadakop ug gipapriso sa iyang asawa niadtong milabay’ng hapon diha sa dakbayan sa Lapulapu gumikan sa reklamong paglugos kaniya niini.

Ang gipadakop mao si Bradny Paul Norman, kinsa anaa karon sa Lapulapu City Police detention cell sa kapolisan sa dakbayan sa Mandaue ug Lapulapu pinaagi sa usa ka warrant of arrest nga giluwatan ni Lapulapu City RTC branch 53 Hon. Judge Gilbert Moises niadtong petsa 9 ning bulan sa Hulyo ning tuiga sa kasong pagpanglugos nga walay piyansa nga girekomendar.

Sa pakighinabi sa Banat News ngadto ni Norman nasagmuyo kini sa balaod sa Pilipinas ug sa iyang asawa nga maoy mikiha kaniya sa maong kaso.

Matud pa niya nga may giluwatan silang “affidavit” nga dili na kini mopadayon og pasaka og kaso batok kaniya.

Ang suspek mitug-an nga nasuko ang iyang asawa gumikan kay padayon siya pagsustento sa iyang uyab nga iyang napamabdosan kaniadto.

Si Norman ug ang kihante siyam na ka bulang kasal, apan wala kini ilimod ni Norman nga aduna siyay anak sa daan niyang uyab nga Pilipina.

Gikahibulong usab ni Norman nganong dali kaayo ang paggawas sa warrant nga wala gani siya moagi og imbestigasyon ug wala usab siya’y nadawat nga subpoena kalabot sa maong kaso, ug gani miluwat pa og ‘affidavit of desistance’ ang iyang asawa nga mosibog sa kaso.

Nabantayan usab sa Banat News nga ang kihante maoy personal nga mihatud og pagkaon sa suspek diha sa karsel niini. - Bong Soriano (BANAT NEWS)