Bombay Gipatay sa Carcar

CEBU, Philippines - Usa ka Indian nga tigpatanto og kwarta ang gipusil patay sa duha ka lalaking luwan og motorsiklo samtang naningil sa mga utangan kagahapon sa alas 12:45 sa udto sa sitio Lumboy sa barangay Liboron siyudad sa Carcar.

Si SPO4 Ruben Renes, imbestigador sa Carcar City Police Station nga nahinabi sa Banat News sa telepono kagahapon sa hapon miila sa biktima nga mao si Malinder “Michael” Comar, 39, kasamtangang nagpuyo diha sa sitio Luwan-luwan sa barangay Poblacion 2 sa nahisgutang siyudad.

Sa pasiunang imbestigasyon sa kapolisan naningil sa mga kabalayan ang biktima ug sa paggawas niini sa karsada diin gi-parking ang iyahang motorsiklo kalit nga miduol ang usa ka lalaki ug gipusil si Comar makadaghang higayon.

Ang biktima nakaangkon og daghang samad pinusilan sa walang bahin sa ulo, bukobuko, dughan ug liog nga milapos sa pikas bahin nga maoy gituuhang nakaingon sa iyang hinanaling kamatayon.

Ang kapolisan nakakuha og pito ka kabhang sa wala pa matinong kalibre sa armas sa crime scene nga gituohang gigamit sa wala mailhing mamumuno nga gidudahang mga gun for hires.

Si Renes miingon nga dili pa nila matumbok kun tulis ba ang motibo sanglit ang kwartang kapin sa P18 mil sa bulsa sa biktima ingon man ang mga alahas ug relo wala kuhaa.

Apan gibutyag ni Renes nga usa sa ilang gitutokan sa imbestigasyon mao ang posibleng koneksyon sa nahitabong away tali ni Comar ug laing Indian niadtong Hunyo 26 nga ilang girespondihan.

Niadtong adlawa ang asawa ni Comar nga usa ka Filipina maoy nangayog tabang kanila dihang usa ka Del Harender Singh nga nagdala og armas ang miabot sa ilang balay ug nangita kang Comar, dihang nahibaw-ang wala si Comar sa ilang balay gihulga niini ang kapikas sa biktima.

Si Singh ilang nadakpan ug napasakaan og kasong Illegal Possession of firearms tungod sa nakuhang kalibre .45 nga pistola.

Niingon si Renes ilang giadto ang gipuy-an ni Singh aron imbitahon apan wala kini sa pinuy-anan niini.

Kini maoy ikaduhang gipusil nga negosyante sa maong siyudad diin sa miaging Lunes sa gabii gipusil patay usab si Eric Uraca nga usa ka negosyante, hinuon nadakpan sa kapolisan ang duha ka gunman ug nailhan usab ang mastermind ug napasakaan na og kaso. (BANAT NEWS)