Panday giluba sa rugby boys

CEBU Philippines - Nabulit sa samad ang lawas sa usa ka panday human kini lubaa sa mga rugby boys kinsa nasuko nga iyang gibadlong didto sa barangay Tejero, ning dakbayan sa Sugbo sa miaging kaadlawon.

Ang biktima mao si Roel Baron alyas “Cocoy”, 33, usa ka panday, nga taga sitio Humay-humay, barangay Inayawan, ning dakbayan, samtang ang   mga suspetsado nailhan usab nga si   Robert Jontoy, ug ang kauban niining nailhan lang sa ngalang   “Charlie” pulos taga barangay Tejero.

Sumala sa kapolisan nga ang biktima mitambong sa birthday sa iyang igsoong babaye sa Tejero dihang sa iyang pagpauli, iyang nakita ang mga suspetsado ug mga kaubanan nga nagsuyop og rugby sa agianan, busa iya kining gibadlong.

Apan matud pa misilaob ang kasuko sa mga suspetsado ug dihadiha gitabangan siya og kulata niini, ug wala pa matagbaw, usa sa grupo ang milanit og kutsilyo ug dihadiha gitusak sa dinunggaban ang lawas sa biktima.

Busa samdan kini sa liog, kilid, ug sampot, apan nasalbar gihapon siya kay nakadagan pa ang biktima ug nakapangayo og panabang sa iyang igsoon.

Ang biktima gihatod dayon ngadto sa   Cebu City Medical Center samtang padayon pang gipangita sa kapolisan ang mga suspetsado. (BANAT NEWS)