Supporters ni P-Noy mikuwestiyon sa Alvarez appointment
CEBU Philippines - Ang mga supporter ni Presidente Benigno Simeon Aquino III sa Kabisay-an ug Mindanao mikuwestiyon sa appointment sa negosyanteng si Angelito Alvarez isip commissioner sa Bureau of Customs.
Mga sakop sa Tuloy Pinoy ug Liberal Party sa Sugbo mipaabot sa ilang reklamo batok ni Alvarez ngadto sa Malacañang. Lakip sa mukuwestiyon sa pagtudlo kang Alvarez mao ang Sugboanon nga si Sen. Tito Sotto.
Si Ed Ramirez, opisyal sa Tuloy Pinoy Negros Occidental, miingon nga ang media sa Bacolod walay puas sa pagsaway tungod sa conflict of interest ni Alvarez pagdumala sa customs ilabi na nga gikan kini sa Airfreight 21000 Inc. ug Federal Express nga parehong nalambigit og negosyo sa customs.
“Yes nakarating na (ang aming sentimento) kay P-Noy but take into consideration na hindi basta ma-overhaul overnight ang issue ng corruption so let's be vigilant,” si Ramirez nagkanayon sa pamahayag nga nadawat sa Banat News.
Si Alvarez nahimong kontrobersiyal tungod sa iyang pagpanikas sa Mango Tee 2010 golf tournament sa Alabang Country Club.
Si Sen. Sotto usab nagkanayon nga siya ug mga kaubang player sa golf nasubo sa pagpagamay sa insidente nga miresulta sa pagkasuspenso ni Alvarez sa club ug dismissal sa duha ka caddies ug usa ka golfmate ni Alvarez sa iyang trabaho.
Matud ni Sotto nga kinahanglang dili maapil si Pres. Aquino sa problema ni Alvarez tungod sa iyang pagpanikas sa golf.
Si Bokal Shirley Aala sa Davao del Norte nga sakop sa Liberal Party ug pro-Noynoy campaigner sa Mindanao nagkanayon nga angayang motudlo si Pres. Aquino og tawo nga adunay moralidad ug integridad. (John Rey Saavedra) (BANAT NEWS)
- Latest
- Trending
