Referee sa bilyaran gipusil sa nagmotor

CEBU, Philippines - Patay ang usa ka referee sa bilyard nga natulog sa lingkuranan dihang kalit gipusil sa backrider sa motorsiklo alas-2 pasado ang takna sa miaging kaadlawon sa sitio Marfa sa barangay Bakilid, dakbayan sa Mandaue.

Ang biktima mao si Christopher Crio, 27, nagpuyo sa maong lugar kinsa gipusil sa wala hiilhing lalaki nga gihulagway nga kasarangan lamang ang panglawas ug pamarog nga gibanabanang anaa pa sa 20 kapin ang panuigon.

Matud pa ni PO3 Joselito Catabas sa Homicide Section sa kapolisan sa Mandaue City Police Office (MCPO) nga base sa pipila ka mga nakasaksi sa maong hitabo nga nahinanok og katulog ang biktima nga naghigda sa kahoy nga lingkuranan.

Dangtan pila ka gutlo miabot ang motorsiklo nga kolor pula nga giluwanan sa duha ka wala hiilhing lalaki ug nanaug ang backrider nga wala magsul-ob og crash helmet ug nagdali sa pagduol sa biktima dayong sangpit sa pangalan niini.

Gisundan dayon kini og buto sa armas ug ang tingog sa bulhot sa makina sa motorsiklo palayo sa maong lugar.

Ang mga silingan ug kabanay sa biktima nga daling misusi, sa iyang gikahimutangan nakugang nga duna kini samad sa ulo ug kalawasan ug patay na.

Wala pa matumbok sa kapolisan ang motibo ug mamumuno sa bikima apan gisubay na ang anggulong posibleng atraso ang hinungdan niini. (BANAT NEWS)