Illegal nga panagat gukdon

CEBU, Philippines - Tinud-on na og gukod sa kapolisan sa dakbayan sa Lapulapu ang mga dinamitero ug tigpanghilo og isda pinaagi sa pagpatrolya nila kanunay sa kadagatan. Mao kini gibutyag ni Konsehal Junrey Gestopa nga maoy chairman sa environment sa konseho sa maong dakbayan kinsa miingon nga kauban sa kapolisan ang taga City Fisheries and Aquatic Management Council (CFARM) nga gipangulohan ni Orlando Leyson.

Matud pa ni Gestopa nga palabungon nila ang mga gasang sa kadagatan ug padaghanon nila pag-ayo ang mga isda sa ilang kadagatan karong ubos na kini sa pamunoan ni Mayor Paz Radaza.

Si Gestopa miingon nga andam na ang pump boat nga maoy ipatrolya sa kadagatan sa dakbayan nga motadlas ug maggabasgabas ngadto sa isla sa Olango aron sipongon ang tanang mananagat nga mogamit sa illegal nga panagat.

Ang kadagatan sa Lapulapu gilangkoban sa mga isla nga naglakip sa Caubyan ug Pangan-an nga nagdugtong sa kadagatan sa lalawigan sa Bohol. (BANAT NEWS)