Nagtangkil og armas gipriso

CEBU, Philippines - Nabalhog sa prisohan ang usa ka tawong nagtangkil og armas de fuego didto sa merkado publiko sa barangay Pasil, ning dakbayan sa Sugbo kagahapon sa alas 12:00 pasado sa udto.

Ang suspetsado giila sa kapolisan sa San Nicolas Police Station nga si Vicente Sumalinog, 38, minyo nga lumad nga taga sitio Cordova, lungsod sa Buenavista, lalawigan sa Bohol, apan mag-anhian sa Sugbo kay moduaw sa iyang mga anak nga anaa magpuyo sa Pasil.

Kagahapon sa udto ang anak niining babaye nga minyo maoy mipahibawo sa mga tanod nga nagtangkil og armas ang iyang amahan.

Busa gisundan dayon kini ni Roberto Tesoro,   barangay tanod sa barangay Suba samtang nagpaingon kini sa usa ka bakery sa maong lugar.

Dihang gisita kini ni Tesoro , mihana kini og lugnot, apan gumikan kay napiog niya ug mga kaubang tanod ang lihok sa suspetsado, wala na kini makahiwasa pag-ayo ug nasakmit usab dayon ang iyang .38 kalibreng revolver nga giluklok sa iyang hawak uban sa unom ka mga buhing bala niini.

Dihadiha gidala dayon sa mga tanod ang suspetado ngadto sa San Nicolas Police Station ug tua siya karon itanggong. (BANAT NEWS)