Migukod kutsilyo sa kapuyo sikop

CEBU, Philippines - Nagtingkagol sa Talisay City detention cell ang usa ka 43-anyos nga lalaki human kini dakpa sa kapolisan kay nasakpan nila sa akto nga migukod og kutsilyo sa iyang kapuyo didto sa barangay Poblacion, dakbayan sa Talisay kagahapon sayo sa buntag.

Ang suspetsado mao si Cornelio Samson, ulitawo, nga taga sitio Sawsawan, barangay San Roque, Talisay , samtang ang lubaon unta niya mao si Zenaida Calvo, 42, biyuda nga taga Bliss, barangay Lawaan II sa maong dakbayan.

Nasakmit nila ni PO1 James Ray Gador ug PO1 Jessie Ben Gumandal og usa ka kitchen knife nga dunay gitas-ong walo ka pulgada gikan sa suspetsado,

Si PO2 Narciso Alforque, desk officer sa Talisay City Police Station sa pakighinabi niini sa Banat News kagahapon mibutyag nga si Samson hubog nga naaktohan sa nahisgutang mga polis nga nagdala og kutsilyo samtang naggukod sa iyang kapuyo nga si Calvo.

Matud ni Alforque nga si Zenaida misumbong ngadto kaniya nga siya maoy nagbuhi kang Samson tungod kay wala kini trabaho ug kung mahubog ang suspetsado kulatahon siya niini.

Si Samson mag-atubang og kasong kalapasan sa Akta Republika 9262 kon “Violence Against Women and Children Act” ug concealing of deadly weapon. (BANAT NEWS)