Computer classes ipatudlo sa mga public schools

CEBU, Philippines - Miduso si Konsehal Edgardo Labella og resolusyon sa Konseho aron suportahan ang Senate Bill 909 ni Senador Edgardo Angara nga iapil sa curriculum sa elementarya ang computer class.

Matud pa sa konsehal nga nindot ang maong lakang sanglit dili na mauwahi ang mga bata sa bag-ong teknolohiya sanglit gamit usab kini aron dili kini makalitan kung maabot na sila sa kolehiyo hangtud na sa pagpangaplay nila og trabaho.

Nasayran sa kalibutanong pagtuon niadtong 2009 sa World Economic Forum sa Switzerland, nahimutang lang ang Pilipinas sa ika-85 kung hisgutan ang kaandam niini sa Global Network.

Matud pa nga makatabang ang kompyuter sa pagpuno sa kaalam sa usa ka tawo pinaagi sa paspas nga proseso.

Aduna lamang pipila ka mga pampublikong tunghaan sa nasud nga adunay special computer classes sa elementarya ug high school aron tudloan ang mga bata sa basic computer operations.

Kini bisan paman ang ilang mga kaubang pribadong mga tunghaan diha palang sa preparatory schools nagsugod na og tanyag niini. (BANAT NEWS)