'Mandamus' ni Greg gitubag og saway ni Gwen

CEBU, Philippines - Gitubag ni Gob. Gwendolyn Garcia og expose ang kasong writ of mandamus ni Bise Gob. Gregorio Sanchez nga gipasaka batok kaniya.

Sumala pa ni Garcia nga wala siyay angayang i-renew nga kontrata sa mga consultants ni Sanchez tungod kay giputol na nila ang kontrata niadto pang Disyembre 2009.

Matud pa ni Garcia nga may igo siyang rason sa pagputol sa kontrata sa mga consultants ni Sanchez tungod kay wala kini magtrabaho sa Kapitolyo.

Gibutyag ni Garcia nga si Manuel Manuel, ang consultant on organic farming sa bise gobernador kinsa may programa sa sibyaanan sa radyo nga gipanag-iya ni Sanchez nagpunay og saway sa Kapitolyo ug sa provincial agriculturist Necias Vicoy.

Kini tungod sa giingong pagdumili sa pag-endorsar ni Vicoy ngadto sa kagamhanan sa lalawigan sa Sugbu nga ipagamit ang Lacto plant, usa ka fertilizer nga gisagol sa iti sa wati.

Ang maong fertilizer nga usa sa mga produkto sa kompanya sa bise gobernador matud pang Vicoy mahal kaayo nga nagbalor gikan sa P300 ngadto sa P400 per bags (sako) nga duna may mapalit nga fertilizer nga P60 ngadto sa P70 ang matag bag.

Matud pa sa gobernadora nga ang iyang inahan nga si kanhi Judge Ezperanza Garcia ug si Vicoy giimbitar gyud ni Sanchez sa farm niini didto sa Tuburan aron pag-promote sa iyang kaugalingong produkto.

Alang sa gobernadora nga usa na kini ka kalapasan sa balaod tungod kay gidid-an ang mga public officials paggamit sa ilang posisyon alang sa kaugalingong interes.

Ang gobernadora nagkanayon nga inay sawayon ug dauton si Vicoy, angayang magpasalamat pa si Sanchez niini kay kun napalit pa ang mga produkto sa naulahi dugang kasong kriminal ug administratiba unta ang atubangon sa bise gobernador. (BANATNEWS)