CEBU, Philippines - Naangol ang head electrician sa usa sa mga kompanya sulod sa Mactan Economic Processing Zone 1 sa dakbayan sa Lapulapu human kini mahulogi sa usa ka “lifter” (elevator sa kargamento) gikan sa ikatulong andana kagahapon sa hapon.
Ang biktima giilang si Harmon Garcia, nagtrabaho sa Globalware nga nahimutang sulod sa MEPZ 1.
Base sa imbestigasyon ni Sgt. Senen Subario sa PEZA Police nasuta nga mga alas 1:45 kagahapon sa hapon nagkarga sila og mga sinako ug renolyong mga panapton.
Gikatahong usa ka tonelada ang gibug-aton sa maong mga panapton nga ipasaka unta sa taas apan pag-abot sa ikatulong andana nasangit ang panapton hinungdan nga mihunong sa pag-andar ang makina nga mibira sa maong lifter.
Si Garcia human pahibaw-a sa pag-ungot sa makina mikatkat unta sa taas aron susihon ang maong lifter apan dihang diha na sa ilawom sa maong lifter kalit lang kining nahagsa.
Si Garcia nga nakabantay sa paglagapak daling milikay apan naabtan ang ulo niini ug abaga hinungdan sa iyang pagkaangol ug gidali sa pagdala sa tambalanan.
Sa pagsusi ni Sgt. Subario sa kable nga maoy gikumbitayan sa maong lifter naputol diay kini maong nahagsa.
Matud pa ni Subario mipasalig na hinuon ang tagdumala sa Globalware nga sagubangon ang bayrunon ni Garcia sa tambalanan. (BANATNEWS)