Naghikog human wa na matagad sa kabanay

CEBU, Philippines - Patay nang napalgan sa iyang apo ang usa ka 65-anyos nga lalaki kinsa naghikog gamit ang pisi nga gihigot sa iyang liog niadtong Miyerkules sa gabii diha sa barangay Upper Mohon, dakbayan sa Talisay.

 Ang naghikog giila nila ni PO3 Alfredo Cuizon Jr. ug PO1 Jundave David nga si Margarito Villaver, residente sa nahisgutang lugar.

Si Cuizon mibutyag sa Banat News kagahapon nga si Villaver dunay gibiling suicide note ngadto sa iyang ig-agaw nga si Agustina Villaver nga nagpadayag sa iyang kahiubos nga wala nay nag-atiman kaniya ug dili na gani makakaon sa tukmang oras.

Sa iyang pangidaron wala siya’y klarong panginabuhian ug magpangayoan na lang og pagkaon sa iyang mga paryente gumikan kay siya ulitawo.

Sa wala pa maghikog si Villaver mianha pa kini sa gipahigayong party sa ilang silingan ug mibiya usab dayon apan giingong aduna kini gisuksok nga papel sa bulsa sa karsones ni Agustina.

Wala lang panumbalinga ni Agustina kung unsay gisuksok sa iyang ig-agaw tungod kay niadtong higayona nagsayaw man siya.

Apan dihang nakabati siya og taho nga si Villaver nagbitay na sulod sa usa ka payag nga wala nay kinabuhi duol sa balay niini nahinumduman niya ang papel nga gisuksok diha sa iyang bulsa ug sa iyang pagtan-aw niini suicide note diay. - BANAT NEWS